Поштенски пратки надвор од опсегот на универзалната услуга

Неадресирана директна пошта

Неадресирана директна пошта се пратки кои содржат рекламен материјал, пратки кои содржат маркетиншки и други промотивни материјали, a адресата на примачот и името и презимето односно називот на примачот не се наведени на пратката.

Неадресираната директна пошта се испраќа на одредена целна група и на најмалку 100 примачи. Тежината и големината на неадресирана директна пошта мора да одговара на обична писмоносна пратка.

Испраќачот на неадресирана директна пошта пред испраќањето задолжително на давателот на другите поштенски услуги му доставува на увид еден примерок од неадресираната пратка, притоа се обезбедува изјава од испраќачот дека сите пратки ќе одговараат на приложениот примерок.

Пакет

Пакет надвор од опсегот на универзалната поштенска услуга е поштенска пратка со определена големина и тежина која содржи стока со и без означена вредност.

Пакетот има тежина над 10 кг и максимум до 50 кг во внатрешниот сообраќај, а во меѓународниот сообраќај тежина над 20 кг и максимална тежина утврдена со билатерален договор со поштенските управи.

Димензии на пакетот се:

Најголемата димензија на пакетот не треба да биде поголема од 1,50 м за било која од димензиите, ниту пак поголеми од 3 м за збирот од должината и најголемата обиколка измерена во насока различна од онаа на должината.

Пакетот може да ја користи дополнителната услуга издвоено во случаите кога истиот содржи кршливи предмети.

Бизнис пакет

Бизнис пакет е книжена поштенска пратка која при приемот и при врачување се евидентира и може да биде со или без означена вредност. Бизнис пакет се разменува помеѓу две правни лица од и во нивните деловни простории. Бизнис пакетот може да содржи стока, предмети кои се неделиви, репроматеријали за производство, алати, делови од машини и сл.

Тежината на ваквите пакети може да биде над 20 до 50 кг, а димензиите не поголеми од 2 метри за било која од димензиите, ниту поголеми од 5 метри од збирот на должината и обиколката измерена во насока различна од онаа на должината.

Бизнис пакетот може да има посебно ракување односно да биде издвоен пакет.

Пратки со одредено време на достава

Пратки со одредено време на достава се таков вид на пратки каде испраќот избира временски рок на достава во рамки на рокот за достава на давателот на услугата. На адресната страна на пратката задолжително мора да биде назначено времето на достава и телефонскиот број на примачот.

„Пост рестант“  пратка

„Пост рестант“ пратка е поштенска пратка за која испраќачот при предавање на пратката бара пратката да се достави на примачот во одредишната пошта. „Пост рестант“ пратка во адресата на примачот ја содржи ознаката „Пост рестант“, а во одредишната единица на поштенска мрежа се чува 30 дена од денот на пристигнувањето.

Како „Пост рестант“ пратка не може да се предадат итна пратка, ЕМS пратка и судски писма и писма по управна и прекршочна постапка.

Пратки со платен одговор –CCRI/IBRS-пратки

Пратки со платен одговор се писмоносни поштенски пратки (писма и поштенски картички) кои се придружувани или содржат писмоносни пратки со ознака за извршена наплата на поштенска услуга што ја платил испраќачот со цел да добие одговор.

Поштенска упатница

Поштенската упатница е книжена поштенска пратка со која испраќачот доставува одредена сума пари на адресата на примачот.

Максималниот износ што се доставува со една поштенска изнесува 12.000,00 (дванаесет илјади) денари и истиот се определува со одлука на Управниот одбор на АД „Македонска пошта“ – Скопје, а во меѓународниот сообраќај согласно склучени билатерални договори со поштенските управи на Република Хрватска, Словенија и Турција.

Електронска упатница

Електронска упатница е книжена поштенска пратка со која испраќачот дозначува одредена сума на готови пари на примачот и истата се испраќа преку  соодветна компјутерска опрема и мрежа. Испраќач и примач на паричните средства може да биде само физичко лице.

Електронската упатница е услуга со која се обезбедува најбрза и најсигурна исплата на пари на корисниците, бидејќи на примачот му е овозможено да располага со паричните средства веднаш после уплатата на паричните средства од страна на испраќачот.

Прием и исплата на електронска упатница може да се изврши на шалтер во било која поштенска единица на АД Македонска пошта. Тоа значи дека примачот може да ги подигне паричните средства на шалтер во било која поштенска единица истиот момент кога е извршена уплатата од страна на испраќачот.

Mаксималниот паричен износ кој може да се дозначи со една електронска упатница   во внатрешниот сообраќај изнесува 15.000,00 денари.

Цените кои се применуваат за електронската уптаница се изедначени со цените за прием и исплата на поштенска упатница во внатрешен поштенски сообраќај.

Судско писмо и писмо во управна и прекршочна постапка

“Судско писмо и писмо во управна и прекршочна постапка е писмо кое содржи документи во судска, управна и прекршочна постапка, како што се : покани, решенија, одлуки, заклучоци и службени списи кои ги праќаат судовите, јавните обвинителства, органите за прекршок, министерствата, управата за јавни приходи и други државните органи.

Судско писмо и писмо во управна и прекршочна постапка по правило се предава како препорачана пратка со повратница и не може да биде адресирано како “Пост рестант“.

Приемот и доставата на овој вид писма се врши само врз основа на склучен договор.